呢次有好多稀客, 原因係因為呢次係露營, 唔係淨觀星, 所以多左好多人...
我地大部份人係第一次去呢度露營, 論環境, 呢度真係一絕, 因為交通尚算方便 (即係唔使行咁多), 而且景色怡人, 風水又好...
今次係中秋, 所以主菜始終係露營, 唔係觀星... 但原來基本天文知識係好有用既, 因為呢次個天蓋就係按住黃道 (即太陽行過既軌跡) 而設計, 叫一班頹友可以訓晏 D...
一上船, 天開始黑, 已經見倒比城市多好多星, 正!!!! 到左碼頭, 已經可以見倒大三角同佢地所屬既三個星座...
講返觀星, 今次簡直係齊鏡又齊人... 我地有 Pentax PCF III 10x50, 又有 Celestron 10x60, 仲有一支新既 11x70... 單筒方面, 當然有我既 Ranger 啦... 是晚我話之各位死, 一到步既刻映月光... 十四既月光仲有少少 terminator, 都仲映倒少少立體感, 同時間, 又能夠映倒放射紋, 實在太好喇...
當然, 到左食野既時候, 我一定要停一停, 食飽個肚, 先至可以繼續啦! 如果唔係點捱到咁夜!
等食之間, 各位已急不及待走到營的另一邊 (避開營燈), 開始睇下星喇... M7 同 M8 當然要趁早喇... 不過因為已經低左少少, 所以明顯無咁精采, 不過都好! 差 D 唔記得有稀客添! 立即要指下天上面最易認既野, 呢個當然係夏季大三角咁啦! 跟住就天鵝座, 天鷹座, 天琴座, 當然有牛郎, 織女咁啦... 天蝎已經唔易認啦, 因為太低, 所以最後講埋茶壺就收工...
原來雙筒係咁難用既, 因為稀客們話肉眼望倒想睇既野, 但擺埋雙筒, 就立即迷失方向! 做壞人都要做一次, 惟有叫佢地用遠處既燈光 practise 一下先啦, 效果如何不得已知, 因為大家都忙於觀星, 找自己心入面想搵既野... 奈何月光太勁, 搵倒 M31 再教人搵, 都發覺有困難, 我估所有人都搵倒, 不過只係搵倒都唔覺得有乜特別... X(
突然想起, 要映下北極星附近既天區... 60s 曝光, 320mm (135mm equivalent), D 星都好似全部唔轉, 勁! 再試下同樣方法映仙后座附近既天區... 有人問我係咪流星黎喎! 仙后座都唔係距離北極星咁遠唧, 乜已經分別咁大!
等下等下, 乜有粒咁光既星呢! 我以為係獵戶膊頭, 原來唔係... 諗真 D? 土星呀朋友! 點肯定呢? 支 Ranger 剛拆左出黎讓支腳出黎 mount 11x70! 我決定手持! 15 倍已經睇倒有 area 啦, 仲唔係?! 一定係啦! 嘩, 想映土星好耐啦喎! 對唔住都要架啦, 11x70 要讓位喇! 32mm Plossl + 2x shorty barlow + Ranger + Casio QV2800... 好難對焦喎... 粒土星鬼咁快... 好唔開心, 因為超難映! 算喇, 搵個七姊妹星團大家睇下仲好, 起碼開心 D 丫嘛... 用個 zoom frame 到靚一靚先俾各位老細睇!
係喎, 點可以唔 show 土星俾各位稀客睇睇呢! 當然, 呢個差唔多可以話係全天最勁既天體, 絕對唔會令各位老細失望... 由 75x... 再推到 200x, 大家都睇過... 好野黎丫嘛! 不過去到 200x 其實無乜著數, 不過睇黎
人人都鐘意大, 唔鐘意細但 sharp D... 算, 有乜所謂, 最緊要開心丫嘛... 不過要上到 200 倍, 每次只可以一個人睇, 之後我又要 center 返, 再可以到一下個... 所幾辛苦, 但又好鬼開心!
大家都睇完之後, 各人有各人再睇星... 當然, 拿雙筒既方法, 大家都似乎掌握倒, 無咁震啦起馬... 但原來有人嫌雙筒睇倒太多星, 完全迷失方向喎... X(
我死唔斷氣, 再戰土星... 呢次定死 1/8 秒曝光, 對焦就用令到粒土星最光為止... 好似有 D 野喎! 放大睇下... 喂! 我映倒個環啦!!!! Yeah!!! 太興奮添... 諗起要 stacking, 立即唔使錢映多幾十張先... 一共映左 31 張, 其中有幾張用左唔同既 ISO settings... 相機睇都幾好, 不過粒土星都係細左少少...
搵個老細搵志光座丫... 衣架星團, 其實係... 志光哥好似搵唔返喎, 最後都係阿茂勁, 第一個搵倒, 之後志光哥教埋我再搵... 然後用 Ranger 睇, 好似無乜著數, 但勝在 mounted, 個個都可以睇丫嘛... 不過後來好>似都有稀客搵倒啦喎... 幾好丫!
一個出場係獵戶座, 好易認... 但個星雲就... 呢次實在太差啦... 費事介紹, 以免以為係廢物, 下次先啦...
木星始終未能趕及訓覺之前升高 D, 所以都係留返下次先...
今次發現基樑買左支 11x70 之外, 仲有一個非常正既旋轉星圖, 係我一直想買果個... 仲加左紅色小電筒, 簡真係完美配套...!
No comments:
Post a Comment